அம்மா நல்வழி நீ காட்டு -இந்த
அகிலமே உனது விளையாட்டு
வம்பால் உலகம் அழியாமல் இங்கே
வளமை வல்லமை குறையாமல் (அம்மா )
சோம்பல் என்பது தேவை யில்லை -மக்கள்
சுகம் பெற உழைத்தால் துன்பமில்லை
ஆம்பல் பூத்திட்ட குளத்தினிலே -என்றும்
அழகிய காட்சிக்கோ பஞ்சமில்லை (அம்மா )
சாதி என்கின்ற ஆணவமே -நம்மில்
சற்றும் எங்கிலும் நுழையாமல்
மேதினி காத்திட நீ வருவாய் -உலகில்
மேன்மையும் தூய்மையும் நீ தருவாய் (அம்மா)
பெண்ணால் தேசம் சிறந்திடவும் -அவர்
பெருமைகள் வாழ்வினில் அடைந்திடவும்
கண்ணாய் எங்கும் நினைத்திடவும் -எம்
கருணைக் கடலே அருள் புரிவாய் (அம்மா )
எல்லா வரங்களும் நீ யளிக்க -நமது
இந்தியா சிறப்பினில் உயர்ந்திடுமே
பொல்லா குணமுள்ள பகைவர்களும் -ஒரு நாள்
பொசுங்கியே அழிவார் நிச்சயமே (அம்மா )
கருத்துகள் இல்லை:
கருத்துரையிடுக