கன்னித் தமிழ் 7 6 5

தமிழராக        உலகில்         வாழுங்கள்   ---நம்
தாய்த்      தமிழில்      எங்கும்    பேசுங்கள்
அமுதமான      மொழி     நமதல்லவா   ---அதனை
அகிலமெங்கும்   பரவச்   செய்தல்   முறையல்லவா

முன்னாள் முதல்     முழங்கிவரும்     மொழியல்லவா   ---நம்
மூவேந்தர்       செய்து  வைத்த       வழியல்லவா
இந்நாளில்      வெறுத்து விடல்    நியாயமில்லையே   ---இங்கு
தமிழை      விட்டால்      உங்களுக்கு     கதியில்லையே

சிவனாரின்     திருமகனாம்   செந்தில்  வேலன்    ---அவர்
சீரிளமை    முயற்சியினால்    செழுமை     பெற்றது
அரணாக      காப்பதற்கு    அணியாகச்   சேருங்கள்   ---நம்
அன்னைத்    தமிழ்      வாழ்கவென   நீங்கள்   கூறுங்கள்

பேசப்      பேச     தமிழென்று ம்    இனிமையானது  ---மன
வேதனையை     தீர்க்க     என்றும்     மருந்தானது
சோதனைகள்     வந்த    போதும்    வென்று   நிலைத்தது   ---மதுரை
சோமசுந்தரர்    தலைமையிலே  தமிழ்  சங்கம்    கண்டது

உலக நூலாம்      திருக்குறளே      தமிழில்   உள்ளது   ---அதனை
உணர்ந்து     கொண்ட     உலகமே    வியந்து    போனது
கலக  எண்ணம்     கொண்டவர்கள்    காற்றில்    ஓடுவார்   ---நம்
கன்னித்    தமிழ்    வாழ்கவெனக்     களிப்பில்லாடுவோம்